Շատ մը կնունքներու ներկայ գտնուած եմ, ըլլայ բարեկամներու զաւակներու և կամ զաւակներուս և թոռնիկներուս. բայց այս մէկը բացառիկ ազդեցութիւն մը թողուց վրաս:
         Նոյեմբեր ամսուայ պայծառ Շաբաթ օր մը, կէսօրուայ ժամերուն, մօտ 50 անձինք հաւաքուած էին Ս. Ստեփանոս եկեղեցին, ողոցուած սրբանկար պատուհաններէ մաղուած լոյսերով:
         Մի քիչ ուշացած ըլլալով, տեսայ խորանին առջեւ մեծ հայրիկ մը (Տէր Դանիէլ), թոռնիկը (Նոան) գրկին կը բացատրէր Մկրտութեան խորհուրդին իմաստն ու կարեւորութիւնը: Այնքան հարազատ էր մթնոլորտը, կարծես ընտանեկան հաւաքոյթ մ՛ըլլար:
         Նոան զաւակն է Տէր և Տիկին Յակոբ և Արաքսի Նաճարեաններու և եղբայրը երկու սիրասուն քոյրերու, Նունիա և Նայիրա. 3րդ թոռնիկը Նաճարեան ընտանիքին և 16րդ ը Կարապետեան ընտանիքին:
        Երբ քահանան սգեզտաւորուած ներկայացաւ, իրեն կ՛ընկերանային երէք սարկաւաքներ, երկուքը Նոային մեծ քերայրները, Սրկ.Տքթ. Սիմոն Օվաննէսեան, Սրկ. Յակոբ Թէքէեան, և Սրկ. Մօրիս Լահամ, մեծ զարմիկ: Մանուկին կնքահայրն էր Տիար Սեւակ Նաճարեան, հօրեղբայր, և կնքամայրը Օր. Մարալ Առաքելեան, զարմուհի:
        Երկիւղածութեամբ հետեւեցանք Կնունքի ջուրին պատրաստութեան, յարմար տաքութեան և Սուրբ Միւռոնի ( աննիւթական Աղաւնի) ծոռումինև ապա մանուկին թաթխումին: Նոան, որ քիչ մը անհանդարտ էր Մկրտութենէ առաջ, հանդարտեցաւ Սուրբ Միւռոնի օծումով և ճերմակ սգեստսւորուած ՝Տէր Հօր ձերքերուն մէջ, այցելեց և երկրպագեց Սուրբ Խորանի Սաղանը, ձեռքն առաւ Խաչը Տէր Հօր ձերքէն և նոյնիսկ սողաց խորանին առջեւ ինչպէս Աստուծոյ հօտին գառնուկը:
       Այս Կնունքը իր սուրբ խորհուրդին կողքին տարբեր նշանակութիւն մըն ալ կը պարունակէր այն իմաստով, որ մօտիկ հարազատներու կողքին հրաւիրուած էին եկեղեցւոյ Կիրակնօրեայ Վարժարանի ուսուցչական կազմը իբրեւ ներկայացուցիչ Եկեղեցւոյ ընտանիքին որպէսզի, իրենց կարգին, մանուկը նուիրեն Աստուծոյ:
         Ինչպէս Նոյ նահապետ ազատած էր ջրհեղեղէն, նոյնպէս մեր Նոան ազատած էր “Պսակաւոր Ժահրին, Covid 19” ճանկերէն: Այն առումով, ծովեզերեայ ճաշարանը ուր ներկաները հրաւիրուած էին, զարդարուած էր Աւետաբեր աղաւնիի “թէմայով”:

Ամէն մի սեղանի վրայ զետեղուած էր փոքրիկ ձիթենիի ծառ մը, վրան թառած աղաւնիով, և թիւերու փոխան Սուրբ Հոգւոյն պարգեւները՝Սէր,Ուրախութիւն, Խաղաղութիւն, Համբերութիւն,Ազնուութիւն, Բարութիւն, Հաւատարմութիւն, Հեզութիւն և Ժուժկալութիւն:
        Նոյնիսկ օրուայ յիշատակի նուէրն էր մէյ մէկ փոքրիկ մետաղեայ ձիթենիի ճիւղ, կանաչ ծոպով մը:
        Շնորհակալութիւններ բոլոր ներկաներուն, որ բաժնեկցեցին այս օրհնաբեր օրը մեզի հետ և ի մասնաւորի Եկեղեցւոյ հովիւ տէր Դանիէլին, որ այնքան հարազատօրէն ընդունեց Նոան Աստուծոյ Տան մէջ:
        Թող Բարին Աստուած օրհնէ եկեղեցւոյ մանուկները, նոր մկրտուած Նոան և նաեւ միւս թոռնիկներս և պահէ զիրենք Իր Սուրբ Շնորքին մէջ:

                                                                                    Եսթեր Կարապետեան